19 Maj 2020
Ol Dia Brata mo Sista:
Olsem we yumi bin luk plante long ol jenis raon long wol from KOVID-19 sik ia, mifala i bin stretem sam samting long misinari seves, tempol wok, mo ol wei we yumi stap kam tugeta mo stap wosip.
Long ol las dei, i gat ol niufala gaedlaen oli kamaot long ol top man raon long wol we oli save long sik ia. Afta we mifala i toktok mo kaonsel tugeta olsem Fas Presidensi mo Kworom blong Olgeta Twelef Aposol, mifala i filim se bae i waes blong jenisim rod we bae Epril 2020 Jeneral Konfrens blong yumi bae i hapen.
Wanwan sesen, bae oli brodkastem aot long wan smol rum long Tempol Skwea. Fas Presidensi bae i prisaed mo bae i lidim olgeta sesen ia, mo olgeta ia nomo we oli bin invaetem olgeta blong givim toktok o prea, bae oli kam. Miusik blong konfrens ia, oli rekodem i stap finis.
Taem mifala i mekem ol jenis ia, mifala i filim se mifala i save helpem olgeta we oli stap wok blong daonem sik ia blong go olbaot, mo stopem ol nogud wok blong bigfala sik ia. Mifala i talem tangkyu from ol pipol ia, mo stap gohed blong prea from olgeta. Plante stori long saed blong givhan long olgeta we oli stap long nid long ol trabol taem ia, i tajem mifala. Mifala i stap prea from ol gudfala blesing nomo blong Papa long Heven blong stap wetem yufala.
Konfrens ia, bae i wan nambawan konfrens. Ol mesej blong trutok, blong hop, mo insperesen bae oli win taem yumi stap makem Restoresen blong gospel blong Jisas Kraes mo stap lukaot blong stap lisin gud long Hem.
Wetem tru hat,
Fas Presidensi mo Kworom blong Olgeta Twelef Aposol
_____
Apdeit: Ol Jenis blong Tempol Wosip blong Smol Taem.
13 Maj 2020
Ol Dia Brata mo Sista:
Ol jenis blong helt kondisen i stap jenis hariap nomo raon long wol mo i kam wan wari we i stap gro bigwan. Fulap gavman oli putum sam stop mo i nidim blong oli klosem sam tempol blong smol taem. Taem yumi stap gohed blong prea blong lukaotem blong balensem ol samting ia we oli limitim i go wetem nid blong gogohed blong mekem tempol wok, mifala i disaed blong mekem ol stop ia blong smol taem, we bae i stat long 16 Maj 2020 blong evri tempol raon long wol.
- Long ol ples we gavman o sam narafala samting we oli limitim long pablik mo/ o kam tugeta long saed blong relijin, stopem ol tempol aktiviti, proksi mo ol odinens blong olgeta we i laef bae i stop blong smol taem.
- Long ol ples we gavman, o nara rul oli no stopem evri aktiviti blong tempol, olgeta tempol odinens ia, blong olgeta we oli laef i stap, bae oli save gohed tru long apoenmen nomo: hasban mo waef mo pikinini wetem papa mo mama siling odinens mo tu, ol fas odinens mo ol endaomen odinens. Blong wan smol taem nomo, ol tempol proksi odinens bae oli no mekem.
- Evri tempol apatmen bae oli klos.
Ol Jos memba bae oli provaedem ol instraksen wetem ol taemtebol blong wetaem oli save mekem ol odinens we i laef. Wanwan man o woman, we oli putum taem blong ol apoenmen blong olgeta bae wok man blong tempol nao bae i kontaktem olgeta.
Bae ol tempol i mekem evri samting blong i mekem spred blong sik ia i go daon, we i tekem tu, blong mekem namba blong ol wok man blong tempol i go daon, limitim ol ges long ol laef odinens, mo folem ol gaedlaen blong wok wetem ol patron.
Sam moa infomesen bae oli givim i go long ol tempol presidensi, mo sam moa bae oli mekem sapos i gat nid long hem.
Mifala i stap luk fowod wetem bigfala hop long taem we bae ol tempol oli save wok fulwan mo blong i givim ol blesing blong tempol wok long ol memba mo ol bubu blong olgeta.
Wetem tru hat,
Fas Presidensi mo Kworom blong Olgeta Twelef Aposol
_____
Apdeit: Oli Stopem blong Naoia, Ol Kam Tugeta blong Ol Jos Memba Raon long Wol
Ol lokol lida bae oli kaonsel blong talemaot stret olsem wanem blong mekem sakramen i stap blong ol memba long wan taem long wan manis
Fas Presidensi mo Kworom blong Olgeta Twelef Aposol blong Jos Ia blong Jisas Kraes blong Ol Lata-dei Sent, oli sendem leta ia long 12 Maj 2020, i go long ol Jos memba raon long wol.
Ol Dia Brata mo Sista,
Olsem we oli promesem long leta blong 11 Maj 2020, bae mifala i gohed blong kontrolem ol situesen we oli stap jenis we i abaot korona vaeres raon long wol. Mifala i tekem kaonsel blong ol lokol Jos lida, ol lida blong gavman mo ol medikol speselis, mo askem Lod blong i gaedem mifala long ol situesen ia. Naoia, mifala i givim ol apdeit daereksen ia.
Stat naoia, evri kam tugeta we i pablik blong ol Jos memba, bae oli stop fastaem blong naoia; hemia i blong ful wol kasem taem oli givim wan moa notis. Hemia i tekem tu:
- Ol stek konfrens, lidasip konfrens mo ol narafala bigfala kam tugeta
- Evri pablik wosip seves, we i tekem tu, ol sakramen miting
- Ol aktiviti blong branj, wod mo stek
Long ples we i posibol, plis mekem eni lidasip miting we i impoten tru long teknoloji. Ol kwestin blong save stret samting, yu save askem long ol lokol prishud lida. Bae oli givim moa daereksen long saed blong ol nara problem o situesen.
Ol bisop oli mas kaonsel wetem ol stek presiden blong save luk olsem wanem blong mekem sakramen i stap blong ol memba wan taem long wan manis.
Mifala i leftemap tingting blong ol memba long ol efot blong olgeta blong givhan blong kea long wanwan long olgeta. Yumi mas folem eksampol blong Sevya blong blesem mo leftemap spirit blong ol narawan.
Wetem tru hat,
Fas Presidensi mo Kworom blong Olgeta Twelef Aposol