13 Mati, 2020
Uso e ma Tuafafine Pele:
O le vave fesuisuiai o tulaga o le soifua maloloina i le salafa o le lalolagi ua avea ma puna o le popole faatupulaia. O le tele o malo ua faia ni tapu ia ua manaomia ai le tapunia lē tumau o le tele o malumalu. A o matou sailia ma le agaga tatalo le faapaleniina o nei tapulaa ma le manaomia o le faaauauina o galuega faalemalumalu, ua matou filifili ai e faia fetuunaiga lē tumau nei, ia e amatalia i le aso 16 o Mati, 2020, mo malumalu uma i le lalolagi atoa.
• I malo po o nisi tapu i faatasiga i nofoaga faitele ma/po o faatasiga faalelotu ia, i lona aafiaga, ua taofia ai gaoioiga faalemalumalu, o sauniga sui ma sauniga mo ē o soifua o le a taofia lē tumau.
• I malo po o nisi tapu ia e le o taofia ai gaoioiga uma faalemalumalu, o sauniga nei o le malumalu mo tagata o loo soifua o le a taulimaina e tusa ma le aofai faatagaina ma e mo na o taimi faatulagaina: sauniga o le faamauga o tane-ma-le-ava ma le tamaitiiti-i-matua ma sauniga amata ma faaeega paia mo ē o soifua. I se tulaga lē tumau, o sauniga sui faalemalumalu o le a lē faatinoina.
• O le a tapunia uma fale e nonofo ai tagata ulu i le malumalu.
O le a tuuina atu i tagata o le Ekalesia ni faatonuga pe a faia ni a latou taimi faatulagaina mo sauniga o e o soifua. O tagata taitoatasi o i ai ni taimi faatulagaina i le taimi nei o le a faafesootaia e le aufaigaluega o le malumalu.
O le a faia ni laasaga i malumalu uma ina ia faaitiitia ai le lamatia o le pipisi o le faama’i, e aofia ai le faaitiitia o le aufaigaluega o le malumalu, faatapulaa tagata auai i sauniga mo e o soifua, ma ia mulimulitaia taiala nei mo fegalegaleaiga ma tagata ulu.
O le a tuuina atu nisi faamatalaga i au peresitene o malumalu, ma o le a faia nisi fetuunaiga pe a talafeagai ai.
Ua matou tulimatai atu ma le naunautai sili i le taimi o le a mafai ai ona toe faagaoioia malumalu i le gafatia atoa ma tuuina atu faamanuiaga o le galuega faalemalumalu i tagata o le Ekalesia ma o latou augatuua.
Ma le faamaoni lava,
O Le Au Peresitene Sili ma le Korama a Aposetolo e Toasefululua
_____
Talafou: Ua Taofia Lē Tumau Faatasiga o Tagata o le Ekalesia i le Lalolagi Atoa
O le a fefautuaai taitai i le lotoifale e fuafua ai pe faapefea ona maua e tagata o le Ekalesia le faamanatuga pe faatasi i le masina.
Na auina atu e le Au Peresitene Sili ma le Korama a Aposetolo e Toasefululua o Le Ekalesia a Iesu Keriso o le Au Paia o Aso e Gata Ai le tusi lenei i le aso 12 o Mati, 2020, i tagata o le Ekalesia i le lalolagi atoa.
Uso e ma Tuafafine Pele,
E pei ona folafola atu i la matou tusi o le aso 11 o Mati, 2020, matou te faaauau pea ona mata’ituina suiga i tulaga fesootai i le COVID-19 i le lalolagi atoa. Ua matou iloiloina le fautuaga a taitai o le Ekalesia i le lotoifale, taitai faalemalo ma polofesa faafomai, ma ua saili atu foi i le taitaiga a le Alii i nei mataupu. Ua matou tuuina atu nei faatonuga fou nei.
Ia amata nei loa, o faatasiga uma i nofoaga faitele a tagata o le Ekalesia ua taofia lē tumau nei i le lalolagi atoa se’ia toe maua atu se isi faasilasilaga. Ua aofia ai i lenei mea:
- Konafesi faalesiteki, konafesi faaleautaitai ma isi faatasiga tetele.
- Sauniga tapuai uma mo tagata lautele, e aofia ai lotu faamanatuga.
- Gaoioiga a paranesi, uarota ma siteki.
I nofoaga e mafai ai, faamolemole ia faatautaia fonotaga faaleautaitai e manaomia e ala i tekinolosi. O fesili faapitoa e mafai ona faasino atu i taitai perisitua i le lotoifale. Onisi faatonuga e fesootai i isi mataupu o le a tuuina atu.
E tatau i epikopo ona fefautuaai ma o latou peresitene o siteki e fuafua ai pe faapefea ona maua e tagata o le Ekalesia le faamanatuga pe faatasi i le masina.
Matou te uunaia tagata o le Ekalesia i a latou taumafaiga faaleauaunaga ina ia tausia e le tasi le isi. E tatau ona tatou mulimuli i le faataitaiga a le Faaola e faamanuia ma siitia isi.
Matou te tuuina atu la matou molimau i le alofa o le Alii i lenei taimi o le lē mautonu. O le a Ia faamanuiaina outou ia maua le olioli pe a outou faia le mea silisili e ola ma soifua ai i le talalelei a Iesu Keriso i tulaga uma.
Ma le faamaoni lava,
O Le Au Peresitene Sili ma le Korama a Aposetolo e Toasefululua