19 ni Maji, 2020
Kemuni na Taciqu kei na Ganequ:
Me vaka eda sa raica tiko na veisau e vuqa ena veiyasai vuravura ena vuku ni mate e vuravura raraba na COVID-19, keitou sa vakayacora kina na veisau ni kena qaravi na kaulotu, cakacaka ni valetabu, kei na ivakarau ni noda vakasoqoni vata kei na sokalou.
Ena vica na siga oqo keitou sa kauta tiko mai na veidusimaki vou maivei ira na kenadau e vuravura raraba. Ni oti na neitou veivakasalataki vaka Mataveiliutaki Taumada kei na Kuoramu ni iApositolo Le Tinikarua, keitou sa raica ni sa dodonu sara me moici na ivakarau ni qaravi na noda koniferedi raraba ni Epereli 2020.
Na veisoqoni yadua ena kaburaki mai na dua na loma ni olo lailai ena Lomanibai ni Valetabu. Ena vakatulewa ka veiliutaki ena veisoqoni oqo na Mataveiliutaki Taumada, ka ra na tiko ga kina o ira sa sureti mera vosa se masu. Na sereivakatagi ni koniferedi sa na katoni oti tu mai.
Ena kena vakayacori na imoimoi vou oqo, keitou raica ni sa rawa me ra vukei kina era sa cakacakataka tiko me vakamalumalumutaki na kena tete kei na ravuravu ni mate e vuravura raraba oqo. Eda sa vakavinavinaka kina vakalevu vei ira ka da sa masulaki ira tikoga. E tara na yaloi keitou na vuqa na itukutuku keitou rogoca baleta na veiqaravi vei ira era vakaleqai tu ena gauna veivakaleqai oqo. Keitou sa masuta na veivakalougatataki digitaki ni Tamada Vakalomalagi me nomuni.
Oqo ena dua na koniferedi vakasakiti dina. Na itukutuku ni dina, na inuinui, kei na veivakauqeti ena vakayaco bula ni da vakananuma na Vakalesui mai ni kosipeli i Jisu Karisito ka segata me da rogoci Koya.
Wekamuni dina,
Na Mataveiliutaki Taumada kei na Kuoramu ni iApositolo Le Tinikarua
____
iTukutuku Vakavoui: Veisau Vagauna ki na Sokalou e Valetabu
13 ni Maji, 2020
Kemuni na Taciqu kei na Ganequ:
Na veisau vakatotolo ni ituvaki ni bula e vuravura raraba sa dua na vuna e tubu sara tiko kina na kauwai. E vuqa na matanitu era sa biuta na vakatatabu ka sa mai vakavuna na sogo vakawawa ni vica na valetabu. Ena neitou vakasaqara ena yalomasumasu me vakatautauvata taki na vakalailaitaki ni veiqaravi kei na gagadre me tomani tiko na cakacaka ni valetabu, keitou sa nanuma me vakayacora e vica na veisau vagauna oqo, e tekivu mai na 16 ni Maji, 2020, ena veivaletabu e vuravura raraba.
• Ena veimatanitu se veivanua e tiko kina na vakatatabu ni soqoni lewe levu vakararaba/se vakalotu, ena gauna totolo duadua, me cegu toka mada na qaravi itavi e valetabu, na cakacaka vakalotu kece ni valetabu bula se mate ena mai tu mada vakawawa.
• Ena veimatanitu se vakatatabu tale eso e sega ni vakatabuya na itavi ni valetabu, na veicakacaka vakalotu eso me baleti ira na bula ena rawa ni vakayacori me vaka e rawa ni veidonui, ia ena vakayacori ga ena nomu kerekere taumada rawa yani sai koya oqo na: cakacaka vakalotu ni veivauci ni tagane-vei-watina kei na gone-vei-rau na itubutubu kei na inisitori kei na edaumeni. Ena gauna oqo, e na sega ni vakayacori na cakacaka vakalotu ni valetabu baleti ira na mate.
• E na sogo kece na itikotiko ni valetabu vei ira na petereni.
Ena vakarautaki vei ira na lewe ni Lotu na veidusimaki ena gauna era na veitaratara rawa yani me baleta na nodra cakacaka vakalotu na bula. O ira na tamata era sa veitaratara oti yani ki valetabu, ena dua e cakacaka e valetabu ena veitaratara yani vei ira.
Oqo na veika ena vakayacori ena veivaletabu me vakalailaitaki kina na dewa ni mate, e oka kina na vakalailaitaki ni tamata e cakacaka, vakakina na tamata era sureti me ra tiko ena cakacaka vakalotu baleta na bula, kei na vakamuri ni veidusimaki ni veimaliwai kei ira na petereni.
Na ikuri ni itukutuku ena vakarautaki yani vei ira na mataveiliutaki ni valetabu, ka na yaco tiko yani na veisau eso ena kena gauna donu.
Keitou sa nanamaki tiko ki na gauna ena rawa ni cakacaka vakataucoko na valetabu me rawa ni nodra na veivakalougatataki ni cakacaka ni valetabu na lewenilotu kei ira na nodra qase eliu.
Wekamuni dina,
Na Mataveiliutaki Taumada kei na Kuoramu ni iApositolo Le Tinikarua
_____
iTukutuku Vakavoui: Na Soqoni ni Lewe ni Lotu e Vakadaroi Taumada e Vuravura Raraba
Era na veitalanoa na veiliutaki ena nomuni vei vanua me ra navuca na kena rawa ni vakayacori na sakaramede vei ira na lewenilotu ke lailai me vakadua ena dua na vula
Na Mataveiliutaki Taumada kei na kuoramu ni iApositolo Le Tinikarua ni Na Lotu i Jisu Karisito ni Yalododonu Edaidai vakauta na ivola oqo 12 ni Maji, 2020, vei ria na lewe ni Lotu e vuravura raraba.
Kemuni na Taciqu kei na Ganequ:
Me vaka a yalataki ena neitou ivola ena ika 11 ni Maji, 2020, ni da tomana tiko me muataka na veisau ni ituvaki baleta na COVID-19 ena veiyasai vuravura. Keitou sa vakasamataka na nodra ivakasala na Veiliutaki ni Lotu ena nomuni vanua, na ivakailesilesi vakamatanitu kei na kenadau ni veiqaravi vakavuniwai, ka vakasaqara na veudusimaki ni Turaga ena veika oqo. Keitou vakarautaki ena gauna oqo na idusidusi vou oqo.
Me tekivu ena gauna oqo, na soqoni vata vaka lewe ni Lotu sa na mai vakadaroi ka tuvakawawa e vuravura raraba, ena qai vakaraitaki tale yani kevaka dua na kena macala. Oqo oka kina na:
- Koniferedi ni iteki, koniferedi ni veiliutaki kei na soqoni lelevu tale eso.
- Na soqoni raraba kece ni sokalou, ka oka kina na vei soqoni ni sakaramede
- iTaviqaravi ni tabana, tabanalevu kei na iteki
Ena veivanua e rawa kina, yalovinaka me vakayacori na bose ni veiliutaki ena kena vakayagataki na tekinoloji. Na taro matailalai eso e rawa ni tarogi vei ira na nomuni iliuliu vakamatabete ena lotu ena nomuni dui vanua. Na idusidusi tale eso e semati kei na veika tale eso ena qai vakarautaki yani.
Me ra na veitalanoataka na Bisopi kei na nodra peresitedi ni iteki na sala ena rawa kina ni vakarautaki na sakaramede vei ira na lewenilotu ke lailai me vakadua edua na vula.
Keitou sa vakauqeti kemuni ena nomuni sasaga mo ni veiqaravi ka veikaroni vei ira yadua na lewenilotu. Me da na vakamuria na ivakaraitaki ni iVakabula ena nona veilaveti ka vakalougatataki ira na tani.
Keitou vakadinadinataka na nona loloma na Turaga ena gauna bibi oqo. Ena vakalougatataki iko o Koya mo kune marau ena nomu sasaga vinaka duadua mo bulataka na kosipeli i Jisu Karisito ena veituvaki ni bula cava ga.
Wekamuni dina,
Na Mataveiliutaki Taumada kei na Kuoramu ni iApositolo Le Tinikarua