Additional Resource

COVID-19 Kōkāāl (Marshallese)

Oktak ko Rekadu Kitieer ikkijeen Kabun̄jar ilo Tampeļ

M̧aaj 13, 2020

Ro Jeiū im Jatū Rejitōn Bōro: 

Jekjek ko rōm̧ōkaj aer oktak ikkijeen ājmour ipeļaakin laļ in ellakar juon menin inepata me ej ļapļo̧k wōt. Elōn̄ kien ko rekar kōm̧m̧an mo̧ ko me ekar menin aikuj bwe en lōn̄ tampeļ ko ren kilōk ilo ium̧win jidik iien. Ilo ad lukkuun jar im pukot wāween bōļane mo̧ kein ippān aikuj eo n̄an kōm̧m̧ane jerbal ko an tampeļ, jekar pepe n̄an kōm̧m̧ane oktak kein rekadu kitieer, ko renaaj jejjet kitier ilo Maaj 16, 2020, n̄an aolep tampeļ ko ipeļaakin laļ in.

  • Ijoko em̧ōj an kien kamo̧iki ak mo̧ ko jet an public im/ak ippān doon ko an kabun̄ enaaj, n̄e ejejjet kitien, bōjrak m̧akūtkūt ko an tampeļ, jerbal in kain̄i ko ilo etan ro remej im kain̄i ko an ro remour renaaj bōjrak ium̧win jidik iien.
  • Ijoko em̧ōj an kien kamo̧iki ak mo̧ ko jet rejjab bōbrae aolep m̧akūtkūt ko an tampeļ, laajrak in kain̄i kein an tampeļ n̄an armej ro remour renaaj kōm̧m̧an n̄an jon̄an ko me naaj kōmālim kōn abboinmen wōt: kain̄i in liāp n̄an ļeo im lio im ajri ro n̄an jineer im jemāer im kain̄i in initiatory im bōk menin letok kwojarjar eo. Ium̧win jidik iien, kain̄i ko an tampeļ n̄an armej ro remej rejjab maron̄ kōm̧m̧an.
  • Aolep m̧ōn jokwe ko an petron ro renaaj kilōk.

Aolep membōr ro renaaj bōk kōmeļele ko n̄e rej kōm̧m̧an aer abboinmen n̄an kōm̧m̧ani kain̄i ko n̄an ro remour. Kajjojo armej ro me ewōr kiiō aer abboinmen naaj kepaak er jān ippān rijerbal ro an tampeļ.

Bun̄tōn ko renaaj bōk jikier ilo aolep tampeļ ko n̄an kadikļo̧k kauwōtata eo ilo kajedeed nan̄inmej, ekoba kadikļo̧k wōran rijerbal ilo tampeļ, kōm̧m̧an jon̄an rilotok n̄an kam̧oole kain̄i ko an ro remour, im ļoore unin tōl ko n̄an jerbal ippān rijerbal ro an tampeļ.

Meļeļe ko jet naaj maron̄ liļo̧k n̄an tampeļ būreejtōnji ro, im oktak ko tokālik renaaj bar kōm̧m̧an n̄e emenin aikuj.

Jej reim̧aanļo̧k kōn kōtmāne eļap n̄an iien eo tampeļ ko renaaj maron̄ bar jerbal n̄an kōm̧m̧ani aolep jerbal ko ie im leļo̧k kōjeraam̧m̧an ko an jerbal ko an tampeļ n̄an membōr ro im ro jibūer im jim̧aer etto.

Ilo kautiej, 

Būreejtōnji eo Kein Kajuon im Doulul eo an Jon̄oulruo Rijilōk ro 

______

Kōkāāl: Aiintok Doon ko an Membōr ro an Kabun̄ in Rebojrak ilo Ium̧win Jidik Iien ilo Aolepān Peļaakin Laļ

Ritōl ro ilo jikin ko kajjojo renaaj bōk kapilōk n̄an kālet wāween aer kōm̧m̧ane kwojkwoj eo n̄an membōr ro diktata juon kōttan ilo juon allōn̄.

Būreejtōnji eo Kein Kajuon im Doulul eo an Jon̄oulruo Rijilōk ro an Kabun̄ eo an Jisōs Kraist im Armej ro Rekwojarjar ilo Raan ko Āliktata rekar jilkintok leta in ilaļ M̧aaj 12, 2020, n̄an membōr ro an Kabun̄ in ilo Aolepān Laļ in.

Ro Jeiū im Jatū Rejitōn Bōro:

Āinwōt kar kallim̧ur ilo leta eo ilo M̧aaj 11, 2020, jej wōnm̧aanļo̧k wōt im lale oktak ko ilo jekjek ko me rej iookļo̧k COVID-19 ipeļaakin laļ in.  Kōm kar ļōmņak kōn kapilōk eo an ritōl ro an Kabun̄ in ilo jikin ko, ri jerbal ro an kien im taktō ro, im kar kappukot tōl eo an Irooj ilo jekjek kein.  Kōm ej kiiō lewaj tōl ko rekāāl me rej elaajrak.

Jino ilo iien eo em̧ōkaj tata, aolep ippān doon ko an membōr ro an Kabun̄ in rej kōm̧m̧an ipeļaakin laļ in m̧ae naaj bar kōjeļļāiki.  Menin ekoba:

  • Kweilo̧k ko reļļap an stake, kweilo̧k ko an ritōl ro im ippān doon ko jet reļļap.
  • Iien kabun̄ jar ko an aolep, ekoba kweilo̧k in kwojkwoj eo.
  • M̧akūtkūt ko an branch, ward, im stake

Ijo ekkar, ritōl ro rej aikuj tōl jabdewōt kweilo̧k in tōl ko remenin aikuj ilo aer kōjerbal technology. N̄e ewōr kajjitōk remaron̄ kepaake ritōl ro an priesthood ilo jikin eo kwoj pād ie. Tōl ko jet me rej iookļo̧k jekjek ko jet naaj bar kalikkare.

Bisop ro rej aikuj bōk kapilōk ippān stake būreejtōn ro n̄an kāālet wāween aer kōm̧m̧ane kwojkwoj eo n̄an membōr ro diktata juon kōttan ilo juon allōn̄.

Jej rōjan̄ membōr ro ilo jerbal in karejar ko aer n̄an kea im lale doon.  Jej aikuj ļoor waanjon̄ak eo an Rilo̧mo̧o̧r n̄an kōjeraam̧m̧an im lōn̄aj ro jet.

Kōm ej kwaļo̧k am kam̧ool kōn iakwe eo an Irooj ilo iien in bwe me ejjab lukkuun alikkar aolep men. Enaaj kōjeraam̧m̧an kom̧ n̄an en̄jake lan̄lōn̄ ilo am̧ kōm̧m̧an jon̄an am̧ maron̄ n̄an mour kōn gospel eo an Jisōs Kraist ilo aolep jekjek ko kom̧ij ie.

Ilo kautiej, 

Būreejtōnji eo Kein Kajuon im Doulul eo an Jon̄oulruo Rijilōk ro 

Style Guide Note:When reporting about The Church of Jesus Christ of Latter-day Saints, please use the complete name of the Church in the first reference. For more information on the use of the name of the Church, go to our online Style Guide.