19 nō Māti 2020
E te mau taea’e ’e te mau tuahine here ē :
Nā roto i te mau tauira’a e rave rahi tā tātou e ’ite nei ’āti a’e te ao nei nā roto i teie ma’i pe’e COVID-19, ’ua rave mātou i tē tahi mau tauira’a nō te ’ohipa misiōnare, ’ohipa hiero, ’e te huru nō tā tātou mau ha’aputuputura’a ’e te purera’a.
I roto i te mau mahana i ma’iri iho nei, ’ua hiti mai tē tahi mau arata’ira’a ’āpī mai roto mai i te mau ’aivāna’a ’āti a’e te ao nei. I muri a’e i te paraparaura’a te Peresidenira’a Mātāmua ’e te Tino Ahuru Ma Piti ’āpōsetolo, ’ua feruri mātou e mea tano ’ia taui fa’ahou i te fa’anahora’a o tā tātou ’āmuira’a rahi nō ’ēperēra 2020.
E ha’apūrorohia te mau tuha’a tāta’itahi nā roto atu i te hō’ē fare ’āmuira’a na’ina’i i Temple Square. Nā te Peresidenira’a Mātāmua e fa’atere ’e e arata’i i te reira mau tuha’a purera’a, ’e te feiā ana’e tei tītauhia ’ia paraparau ’aore rā, ’ia pure ’o tē haere mai. ’Ua oti te mau hīmene nō te ’āmuira’a i te haruharuhia.
Nā roto i teie mau tauira’a, te mana’o nei mātou ē, e nehenehe tātou e tauturu i te feiā e ’ohipa nei ’ia fa’aiti te pararera’a o teie ma’i pe’e. E māuruuru rahi tō tātou ia rātou ’e e tāmau noa tātou i te pure nō rātou. ’Ua putapū tō mātou ’ā’au i te fa’aro’ora’a e rave rahi ’ā’amu nō ni’a i te ’ohipa aupurura’a i te feiā nava’i ’ore i roto i teie mau taime pāpū ’ore. Tē pure nei mātou ’ia tae mai te mau ha’amaita’ira’a rarahi a te Metua i te ao ra i ni’a ia ’outou.
E riro teie ’ei ’āmuira’a fa’ahiahia roa. E ’ite-rahi-hia te mau parau poro’i o te parau mau, te ti’aturira’a, ’e te fa’aurura’a, a fa’ahanahana ai tātou i te fa’aho’i-fa’ahou-ra’a mai o te ’evanelia a Iesu Mesia ’e a ’imi ai tātou ’ia fa’aro’o iāna.
Ma te aroha mau,
Te Peresidenira’a Mātāmua ’e te pupu nō te Tinō ’Ahuru Ma Piti ’āpōsetolo
_____
Parau ’āpī : Te mau fa’atanora’a nō te ha’amorira’a i roto i te hiero, nō te hō’ē tau
13 nō Māti 2020
E te mau taea’e ’e te mau tuahine here ē :
’Ua riro te ’ū’anara’a o te fifi ea ’ati a’e i te ao nei ’ei tumu nō te tahi ha’ape’ape’ara’a rahi. ’Ua tu’u te mau fa’aterera’a hau e rave rahi i te tahi mau ’ōpanira’a ’e ’ua tītauhia e ’ōpani i te tahi mau hiero nō te hō’ē tau. Nā roto i te pure, ’ua ’imi mātou i te ’aifāito i roto i teie mau ’ōpanira’a ’e te hina’aro e fa’anu’u atu ā i te ’ohipa a te hiero, ’e ’ua fa’aoti mātou e rave i te mau fa’atanora’a i muri nei nō te hō’ē tau, e ha’amata te reira i te 16 nō Māti 2020, nō te tā’āto’ara’a o te mau hiero ’ati a’e i te ao nei.
- I te mau vāhi e riro te mau fa’aotira’a a te fa’aterera’a hau ’aore rā te tahi atu mau ’ōpanira’a i ni’a i te mau putuputura’a ta’ata ’e putuputura’a fa’aro’o, i te tāpe’a i te ’ohipa hiero, e fa’ataimehia te mau ’ōro’a feiā mono ’e te mau ’ōro’a feiā ora, nō te hō’ē tau.
- I te mau vāhi ’aita te mau fa’aterera’a hau ’e te tahi atu mau ’ōpanira’a e tāpe’a i te ’ohipa hiero, e hi’ohia te rāve’a nō te fa’anaho i te mau ’ōro’a feiā ora, nō te mau ta’ata noa rā e tāniuniu nō te tāpa’o i tō rātou i’oa : nō te mau ’ōro’a tā’atira’a tāne ’e vahine ’e te mau ’ōro’a tā’atira’a metua ’e tamari’i, nā reira ato’a te mau ’ōro’a fa’aineinera’a ’e te mau ’ōro’a hiero nō te feiā ora. Nō te hō’ē tau, e’ita te mau ’ōro’a feiā mono o te hiero e ravehia.
- E ’ōpanihia te mau fare tīpaera’a ato’a nō te ta’ata haere hiero.
E hōro’ahia te mau arata’ira’a i te mau melo o te ’Ēkālesia e tāniuniu nō te tāpa’o i tō rātou i’oa nō te mau ’ōro’a feiā ora. Nā te mau rave ’ohipa o te hiero e tāniuniu i te mau ta’ata tei tāpa’o i tō rātou i’oa nō te tahi ’ōro’a.
E ravehia te mau fa’aotira’a i roto i te tā’āto’ara’a o te mau hiero nō te fa’aiti i te fifi ha’apararera’a ma’i, mai te fa’aitira’a i te mau rave ’ohipa o te hiero, te tā’ōti’ara’a i te mau manihini e tae mai nō te mau ’ōro’a feiā ora ’e te pe’era’a i te mau arata’ira’a nō ni’a i te ’ohipara’a ’e te feiā haere hiero.
E fa’ataehia te tahi atu ā ha’amāramaramara’a i te mau peresidenira’a hiero, ’e e ravehia te tahi atu ā fa’atanora’a ’āraua’e mai te mea e tītauhia.
Tē tīa’i māite nei mātou i te taime rahi e nehenehe fa’ahou ai te mau hiero e tere hope roa nō te fa’atae i te mau ha’amaita’ira’a o te ’ohipa hiero i te mau melo ’e tō rātou hui tupuna.
Ma te aroha mau,
Te Peresidenira’a Mātāmua ’e te pupu nō te Tinō ’Ahuru Ma Piti ’āpōsetolo
_____
Parau ’āpī : ’Ua fa’a’orehia te mau putuputura’a rahi a te mau melo o te ’Ēkālesia nō te hō’ē tau, ’ati a’e i te ao nei.
E paraparau te mau feiā fa’atere i te mau fenua nāhea te mau melo e nehenehe ai e rave i te ’ōro’a, hō’ē a’e taime i roto i te ’āva’e
’Ua hāponō te Peresidenira’a Mātāmua ’e te pupu nō te Tinō ’Ahuru Ma Piti ’āpōsetolo o Te ’Ēkālesia a Iesu Mesia i te Feiā Mo’a i te mau Mahana Hope’a nei i te rata i muri nei nō te 12 nō Māti, i te mau melo o te ’Ēkālesia ’ati a’e i te ao nei.
E au mau taea’e, e au mau tuahine,
Mai tei parauhia i roto i tā mātou rata nō te 11 nō Māti 2020, tē tāmau nei mātou i te hi’o i te vaira’a o te ma’i COVID-19 ’ati a’e i te ao nei. ’Ua hi’o mātou i te mana’o o te mau feiā fa’atere o te ’Ēkālesia i te mau fenua, te mana’o o te mau fa’aterera’a hau ’e o te mau ta’ata e ha’a ra i te pae nō te ea, ’e ’ua ’imi ato’a mātou i te arata’ira’a a te Fa’aora nō ni’a i teie ’ohipa. Teie i muri nei te mau arata’ira’a ’āpī.
Ha’amata i teienei, e fa’a’orehia te mau putuputura’a ato’a a te mau melo o te ’Ēkālesia nō te hō’ē tau, ’ati a’e i te ao nei, ē tae noa atu i te taime e hāponō atu mātou i te parau ’āpī. Teie te mau putuputura’a :
- Te mau ’āmuira’a titi, te mau ’āmuira’a feiā fa’atere ’e te tahi atu mau putuputura’a rahi
- Te mau purera’a rahi, mai te purera’a ’ōro’a
- Te mau ’ohipa ri’i (fa’a’oa’oara’a) a te ’āma’a, te pāroita ’e te titi
Mai te mea e nehenehe, e fa’atupuhia te mau rurura’a tei tītauhia nō te feiā fa’atere nā roto i te rāve’a ’āpī. Mai te mea tē vai ra te uira’a ta’a ’ē, ’a fa’atae atu i te feiā fa’atere autahu’ara’a o te fenua iho. E fa’ataehia atu te mau arata’ira’a nō te tahi atu mau ’ohipa ’āraua’e.
E paraparau te mau ’episekōpo ’e tō rātou peresideni titi nō te fa’aoti nāhea te mau melo e nehenehe ai e rave i te ’ōro’a hō’ē a’e taime i roto i te ’āva’e.
Tē fa’aitoito nei mātou i te mau melo i tā rātou mau tauto’ora’a aupurura’a nō te ha’apa’o i te tahi ’e te tahi. ’Ia pe’e tātou i te hi’ora’a o te Fa’aora i te ha’amaita’ira’a ’e i te fa’ateiteira’a i te ta’ata.
Tē hōro’a nei mātou i tō mātou ’itera’a pāpū nō te here o te Fatu i roto i teie mau tau pāpū ’ore. Nāna e ha’amaita’i ia ’outou, ’ia ’ite ’outou i te ’oa’oa ’a fa’aitoito noa ai i te ora i te ’evanelia a Iesu Mesia noa atu ā te mau mea e tupu ra.
Ma te aroha mau,
Te Peresidenira’a Mātāmua ’e te pupu nō te Tinō ’Ahuru Ma Piti ’āpōsetolo