Maati 13, 2020
Tarira ao Mwaanera aika tangiraki:
Waekoan bitakin aron te marurung e a riki ngkai bwa te raraoma n te aonaaba ae bwanin. A mwaiti tautaeka ae a tia ni kamatoa te tua are e a karika kainakin tabeua tembora n te tai ae uarereke. Ngkai ti a tia n tataromwaaka ni karekea te baeranti nakon taian kangabuaka ma kainanoan karaoan te mwakuri n te tembora, ti a tia ni iangoia ni karaoi bitaki aika uarereke aikai, are a na kabonganaaki ni Maati 16, 2020, ibukin tembora nako n te aonaaba.
- N taian tautaeka ke kangabuaka ake tabeua iaon te bootaki n ana tabo te botanaomata ao/ke taabo n aaro, are e a matoa iai, katokan waaki n te tembora, mwakuri n otenanti ibukiia ake a mate ao ake a maiu e na katokaki inanon te tai ae uarereke.
- N taian tautaeka ke kangabuaka tabeua ake aki katokii waaki n te mwakuri n te tembora, otenanti ibukiia ake a maiu e na karaoaki n aron te mwaiti are e baireaki man tii kabaeakin am tai: te otenanti ni kabaeakiia buumwaane ao buuaine ao ataei nakoia aia karo ao otenanti ni moan mwakuri ao entaumente. Inanon te tai ae uarereke, otenanti ni mwakuri ibukiia mate e na aki karaoaki.
- Ni kabane auti ibukiia taan kawara te tembora a na bane ni kainaki.
E na katauraoaki nakoia kaain te Ekaretia kaetieti ngkana a kabaei aia tai ibukin karaoan otenanti ibukiia ake a maiu. Naake iai aia tai n nako n te tembora a na reitaki taan mwakuri n te tembora ma ngaiia.
Ana bane ni karaoaki mwakuri inanon tembora ni kabane ni buoka kauarerekean butinakon te aoraki aei, n raonaki ma kauarerekean mwaitiia taan mwakuri n te tembora, kauarerekean mwaitia iruaa ake a na ira karaoan te otenanti ibukiia ake a maiu, ao n irii kaetieti ibukin te reitaki ma taan mwakuri n te tembora.
A na kanakoaki rongorongo riki tabeua nakoia beretitentii n te tembora, ao bitaki riki ake imwiina a na karaoaki ngkana e riai.
Ti tarai taai aika a na roko ma te nano ni ingainga ngkana e a manga waaki n ae bwanin te mwakuri n te tembora ao ni kanakoa te kakabwaia n te tembora nakoia membwa ao aia bakatibu.
Raomi ni koaua,
Te Moan Beretitentii ao te Kooram n Abotoro n te Tengaun ma Uoman
_____
Rongorongo ae Boou: Bootakiia Membwa n te Ekaretia A Katokaki Moa n te Tai ae e Uarereke ni Katobibia te Aonaaba
Te Moan Beretitentii ao te Kooram n Abotoro n te Tengaun ma Uoman n Ana Ekaretia Iesu Kristo ibukiia Aika Itiaki ni Boong aika Kaitira a kanakoa te reta ni Maati 12, 2020, nakoia membwa n te Ekaretia ni kabutaa te aonaaba.
Tarira ao Mwaanera aika tangiraki,
Are ti berita iai inanon ara reta ni Maati 11, 2020, ti reitinako n tarataraa te bitaki nakon baika a riki ni kaineti ma te COVID-19 ni kabutaa te aonaaba. Ti a tia n rinanon aia kaetieti taan kairiiri n te Ekaretia n te tabo, aobitia n taian tautaeka ao taan rabakau n te kuakua, ao ni kakaea ana kairiiri te Uea iaon te bwai ae e riki aei. Ngkai ti a kanakoi kaetieti aika a boou aikai.
N te tai ae e waekoa, ni kabane taian bootaki irouia membwa n te Ekaretia a katokaki moa n te tai ae e uarereke ni kabutaa te aonaaba ni karokoa manga katanoataan are imwiina. Aikai ni ikotaki ma:
- Maungatabu n te titeiki, maungatabu ibukiia taan kairiiri ao tabeua riki bootaki ake a bubura
- Ni kabane bootaki n taromauri, ni ikotaki ma te bootaki n toa
- Waaki ni kakukurei n te mwaanga, uoote ao titeiki
Ngkana e konaa, taiaoka karaoa te bowi ae riai ibukiia taan kairiiri ni kabonganai bwaai n rabakau aika boou. Titiraki aika onoti a kona ni kanakoaki nakoia taan kairiiri n te nakoanibonga n te tabo. Kaetieti ake imwiina ake a kaineti ma bwaai ake tabeua a na manga katauraoaki.
A na marooro bitiobi ma aia titeiki beretitenti ni kakaea te anga bwa a na kanga membwa ni karekea te toa tao inanon teuana namwakaina.
Ti kaungaia membwa inanon aia kekeiaki n aia mwakuri n ibuobuoki ni buokiia i bon imarenaia. Ti riai n ira ana banna ni katooto te Tia Kamaiu ni kakabwaiai ao n tabekiia rake tabeman.
Ti kaota ara kakoaua n Ana tangira te Uea inanon te tai ae e aki ataaki kanoana aei. E na kakabwaiako ni karekea te kimwareirei ngkai ko karaoa am kabanea n tamaroa ni maiuakina ana euangkerio Iesu Kristo inanon bwaai ni kabane.
Raomi ni Koaua,
Te Moan Beretitentii ao te Kooram n Abotoro n te Tengaun ma Uoman