Aggiinnumanto dagiti local leader tapno ikeddeng no kasano nga aramiden nga available ti sakrament kadagiti miembro iti uray maminsan laeng iti makabulan
Ti Umuna a Panguluen ken Korum dagiti Sangapulo-ket-dua nga Apostol ti Ti Simbaan ni Jesucristo dagiti Santo iti Ud-udina nga Aldaw impatulodda ti sumaganad a surat itay Marso 12, 2020 kadagiti miembro ti Simbaan iti sapasap a sangalubongan.
Patpatgenmi a Kakabsat a Lallaki ken Babbai,
Kas naikari iti suratmi idi Marso 11, 2020, ituloymi ti mangmonitor kadagiti agbaliwbaliw a kasasaad a mainaig iti COVID-19 iti intero a sangalubongan. Imbilangmi ti balakad dagiti local leader iti Simbaan, dagiti opisial ti gobierno ken dagiti propesional iti mediko, ken dinawatmi ti pannarabay ti Apo kadagitoy a pakaseknan a banag. Ita ipaaymi dagiti sumaganad a napabaro a direksion.
- Mairugi a dagus, temporario a masuspende ti amin a panaguummong dagiti miembro ti Simbaan iti publiko iti sapasap a sangalubongan agingga nga adda maited a pakaammo. Mairaman ditoy:
- Dagiti komperensia iti stake, komperensia iti kinadadaulo, ken dadduma pay a dadakkel a panaguummong
- Dagiti aktibidad iti branch, ward ken stake
Iti lugar a mabalin, ag-conduct koma kadagiti ania man a kasapulan a mitingyo iti kinadadaulo babaen iti teknolohia. Mabalin nga iturong dagiti nalawag a saludsod kadagiti local priesthood leader. Maitedto ti nayon pay a direksion a mainaig iti dadduma pay a pakaseknan a banag.
Nasken a makiuman dagiti bishop iti stake president-da tapno ikeddeng no kasano nga aramiden nga available ti sakrament kadagiti miembro iti uray maminsan laeng ti makabulan.
Allukoyenmi dagiti miembro kadagiti aramidda iti ministering nga aggiinnaywan iti tunggal maysa. Nasken a surotentayo ti pagwadan ti Mangisalakan a mangbendision ken mangparegta kadagiti dadduma.
Paneknekanmi maipapan iti ayat ti Apo kabayatan daytoy a panawen ti panagduadua. Bendisionannakayto a mangsarak iti rag-o bayat ti panangaramidyo iti amin a kabaelanyo nga agbiag iti ebanghelio ni Jesucristo iti tunggal kasasaad.
Sipupudno,
Ti Umuna a Panguluen ken Korum dagiti Sangapulo-ket-dua nga Apostol